کتاب۔ بلیک اسکن وائٹ ماسک
نوشتہ کار۔ فرانز فینن
جاچ۔ رابعہ بلوچ
فرانز فینن پائک کہ او دا کتابے ہندا سوب آن نوشتہ کرینے تاکہ سیاہ فام و سفیدفام آتا سیالی ءِ پہہ مننگ مرے۔ ریسزم یا نسل پرستی ءِ پہہ مننگ کن ننکن دا گڑا ءِ پہہ مننگ المی ءِ کہ بندغ نا خواست آک انت ءُ و اسہ سیاہ فام ئسے نا خواست آک انت ءُ۔ او پائک کہ اسہ سیاہ فام اس یا اونا طب ءِ پہہ مننگ اڑزان اف انتے کہ سیاہ فام آتا بابت ئٹ بھاز آ متھ/داستان آک جوڑ کننگانو ہرافتا گواچن تون ہچو سیالی ئس اف۔
اولیکو بشخ ئٹ فینن پائِک وختس کہ اینٹیلینز آک فرانس آ کارہ گُڑا اوفک تینے پیہُن و جوان تکِرہ۔ قوضہ گیر اوفتے اوفتا بولی و ربیدہ نا بابت ئٹ بھاز کمتر محسوس کرفک ہندا سوب آن اینٹیلینز آک فرانس ئٹ ہِننگ تون اوار تینا بولی و تینا ربیدہ ءِ گیرام کیرہ و قوضہ گیر نا بولی و ربیدہ ءِ دوئی کننگ نا کوشست کیرہ ۔ فینن پائک کہ فرانس آ بروکا اینٹیلینز آک ہفتہ ہفتہ تینا کوٹی تیٹی آدینک نا مونا سلیرہ و فرینچ بولی ءِ ہیل کننگ نا پریکٹس کیرہ ۔ فینن پائک وختس کہ دا اینٹیلینز آک ولدا تینا ڈیہہ آ کارہ تو اوفتے زیات مہذب باور کرفنگک ۔ سفید فام آک سیاہ فام آتے شیف خلنگ کن اوفتے تون پِڈجِن بولی ٹی ہیت کیرہ ۔ سیاہ فام آک مدام تینے سفید فام آتا مونا لائخ و بود ئنا خواجہ منفنگ نا کوشست ءِ کریرہ ولے فینن پائک کہ تنیا بود و لائخی کس ءِ بچفنگ کتنے ۔ فینن پائک کہ سفید فام آک خوانندہ سیاہ فام آتے تون بھاز ساڑ کریرہ و خاص کر ہمو تیتون ہرافک کارل مارکس نا وڑ انگا انقلابی نوشتکارآتے خوانارہ ۔ فینن پائک کہ ہندن پاننگک کہ ایمی سیزائر ہرا کہ سیاہ فام ئسے ولے سفید فام آتیان ہم جوان فرینچ ئٹی نوشتہ کیک ، گڑا داڑٹی ہچو حیرانی نا ہیت ئس مف انتئے کہ فرانس نا قوضہ کروکا کالونی تے ہم ہنداخس فرینچ پاننگ نا حق ارے اخس کہ سفید فام فرینچ آتے ارے۔
ارٹمیکو بشخ ئٹی فینن سیاہ فام زالبول آتا بابت ئٹ بیان کیک کہ امر سیاہ فام زالبول آک سفید فام آ نرینہ غا تیتون برام کننگ نا مراد تخِرہ ۔ فینن مائیوٹے نا ناول نا زی آ تران کیک ہرا ٹی سیاہ فام زالبول ئس تینا زنک ءِ رکھِنگ کن و مٹ کننگ کن سفید فام ئسے تون برام کیک۔ او چائک ہم کہ اسہ سفید فام ئس اسُل اودے عزت ءُ مہر تننگ کپک ولدا ہم او سفید فام ئسے تون برام کیک ۔ حالانکہ دا بھاز پنی ءُ ناول ئسے ولے فینن دادے منپک انتئے کہ دا اسہ غیر اخلاقی رویہ ئس ردوم ایتک و تالان کیک ۔ داڑان گُڈ فینن عبداللہ ساجدی نا ناول نینی نا بابت ئٹ تران کیک کہ امر اسہ سیاہ فام زالبول ئس اسہ ہندنو سیاہ فام مار اسے نا رسال ءِ نمن کیک ہرا اوڑکن بھاز مہر کیک و دا نا سوب ہندا اس کہ او زالبول سفید فام آتیتون برام کننگ کن مرادی ئس ۔ فینن دا دود نا بھاز مزمت ءِ کیک انتے کہ دن اِنگا رویہ غاک نسل پرستی نا کمک ءِ کیرہ۔
مُسٹمیکو بشخ ئٹ فینن سیاہ فام نرینہ غاتا بابت ئٹ تران کیک کہ امر سفید فام نیاڑی تیتون سیالی جوڑ کننگ اوفتا است ئنا ارمان مریک۔او پائک کہ سفید فام نیاڑی تیتون خاچنگ آن زیات اوفتے تینا دو کیرغ کننگ آن خوش مریرہ۔ فینن رینے مران نا ناول نا مثیل ءِ ایتک کہ ہراڑٹی جین اسہ سیاہ فام ئس مریک و فرانس ئٹی تولوک مریک ۔ اونا بھاز سفید فام ءُ سنگت ہم مریرہ و اسہ سفید فام مسڑ ئسے تون ہم اونا سنگتی و زاتی سیالی مریک۔ جین اسہ بھاز لائخ و ذہین ءُ بندغ ئس مریک ولے اونا سنگتاک اودے ہمو وخت آ قبول کیرہ کہ او تینا پجار آن نمن مرے۔ او ہر وخت تینے منفنگ نا کوشست ئٹی مریک ہرا نا سوب آن او نفسیاتی جیڑہ آتا گواچی مریک۔ فینن پائک کہ اسٹ انگا نفسیاتی جیڑہ نا تجربہ اسہ سیاہ فام و اسہ سفید فام ئسے کن جتا جتا مریک۔
چارمیکو بشخ ئٹی فینن مینونی نا کتاب سائیکالوجی آف کالونائزیشن نا جاچ ءِ ہلیک ۔ ہراٹی مینونی قوضہ گیر و قوضہ مروک آتا نفسیاتی سیالی نا جاچ ءِ ہلیک۔ مینونی تینا کتاب ئٹی پائک کہ کالونائزڈ آتیٹی چنکی آن ابرمی ءُ احساسِ کمتری ئس ودی مریک ولے فینن مینونی نا دا ہیت آ نغد کرسہ پائک کہ کالونائزڈ آتیٹی احساسِ کمتری چنکی آن یا ابرمی ودی مفک بلکہ دا کالونائزیشن نا سدھا غا زیم آک مریرہ۔ فینن پائک کہ امر جہان ئٹی منہ راج، ذات یا مذہب آتے ایلو تیان بڑز و بالا باور کرفنگک، ہرا کہ وائیٹ سُپرمیسی ءِ برجا تخک۔ مینونی پائک کہ امر میلَگیسی نا بندغاک تینا پجار و دودوربیدہ ءِ گیرام کریسر ۔ فینن پائک کہ بندغاک تینا دودوربیدہ ءِ گیرام کتور بلکہ کالونائزر اوفتا دیہاڈ و اوفتا پجار ءِ پُھلانے اوفتیان، اگہ او آجو مروسر گڑا اوفتا سوچ و خیال آک جتا مسرہ ۔
پنچمیکو بشخ ئٹ فینن تینا زند ئنا آزموندہ کروکو تدینی سے نا بابت ئٹ تران کیک کہ اسہ وار او ریل ئٹی سفر کننگ ئٹی مسُنے گڑا اسہ سفید فام چُنا اس خلیس ئٹ پائک ( سیاہ فام ءِ اُربو) ۔ فینن پائک کہ دا اوڑکن بھاز آزار تروکو تجربہ ئس مسنے۔ او پائک کہ نسل پرستی نا ڈول و روشت آک بندغ ئٹی احساسِ کمتری نا سوب جوڑ مریرہ ۔ فینن پائک کہ جین پال سارتر یہودی تا و اوفتا حق آتا بابت ئٹ تران کیک کہ امر اوفتا مذہب نا سوب آن اوفتے آ بیدادی مریک ولے اگہ نن اُرِن تو یہودیک تینا مذہب ءِ بدل کننگ کیرہ ولے سیاہ فام آک تینا رنگ ءِ بدل کننگ کپسہ ۔
ششمیکو بشخ ئٹ فینن پائک کہ تقریباً سائیکو اینالائیٹک تھیوری نا بنداؤ سفیدفام آتا آزموندہ غاتا زی آ تخوک ءِ و سفیدفام و سیاہ فام آتا زند ئٹی بھاز فرخ ارے۔ گڑا نن دا تھیوریی تے سیاہ فام آتے کن غرز کننگ کپنہ ۔ سائیکواینالائیٹک تھیوری نا رد ئٹ بھیم چنکی نا تدینی تے آن ودی مریک ولے فینن پائک کہ نیگروفوبیا نا سوب قوضہ گیری و اونا نسل پرستی نا سوچ ءِ۔
فینن اسہ کیس سٹڈی ئسے نا بابت ئٹ تران کیک کہ اسہ نیاڑی اس مریک اودے ٹِکس نا بیماری مریک ۔ نفسیاتی درمان آن پد اونا ناجوڑی نا سوب سیاہ فام آتا بھیم سرپند مننگک۔
ہفتمیکو بشخ ئٹی فینن سائیکواینالسٹ الفرڈ ایڈلر نا نظریہ نا بابت ئٹ تران کیک۔ او پائک کہ ایڈلر تینا نوشت آتیٹی زیات انفرادی رد ئٹ گڑا تے جاچ کرینے و چاگڑدی جیڑہ و کالونائزیشن نا وڑ انگا جیڑہ غاتے آ پام کتنے ۔ فینن پائک کہ اگہ نن اُرِن گڑا پورو اینٹیلیز نیوروٹک مسنے ہرا نا سوب کالونائزیشن ءِ ۔ او پائک کہ دن انگا چاگڑدی جیڑہ غاتا توجیل ہم اشتماعی مرے ۔
آخیر ئٹ فینن پائک کہ جہان نا ہر غلام اِنگا راج ءِ تینا جیڑہ غا تیکن تینا جند ئنا توجیل آتا گرج ءِ۔ او پائک کہ بیرہ سوب و ڈگنیٹی جہان ءِ بدل کننگ کپسہ بلکہ داڑکن کنفلِکٹ آتا مننگ ہم المی ءِ۔ فینن پائک کہ بائدے نن بیرہ تدوکا وخت اتون تفوک مفن بلکہ ساڑی آ وخت و آخُبت کن تیار مرین۔ فینن اسہ دعا/اومیت ئسے تون کتابے ایسر کیک کہ او مدام ہندنو بندغ ئس مرو کہ ہرا سوج کیک۔
