پلستینی پرچہ وتی زمین ءَ یلو نہ کن اَنت | بانُک بلوچ

 

پلستینی پرچہ وتی زمین ءَ یلو نہ کن اَنت؟

نبشتہ کار: اھمد ابسائس

بلوچی رجانک: بانُک بلوچ

’ھمینچو گیش ازرائیل پلستین ءِ سرا زوراکی کنت ھمینچو گیش پلستینی راج گھگیری کنت‘۔

ازرائیلی لشکر ءِ زوراکی ءُ چُکچینی ءِ سوب تھنا یک سالے ءِ تہ ءَ 42000 پلستینی گازہ ءِ تہ ءَ بیران بوتگ۔ انچو کساس کنگ بیت کہ اے میان ءَ درستیں مرتگیں مردمانی کچ 180000 ءَ چہ گیش اِنت۔ چو گازہ ءِ پیم ءَ ازرائیل ءِ کُشت ءُ کوشی اُرش ماں ویسٹ بینک ءَ اوں بوتگ اَنت کہ اُد ءَ 750 پلستینی بیران بوتگ۔ گوستگیں ماہ ءَ زورگیریں تاگت ازرائیل ءَ وتی زوراکیانی کساس ودینتگ ءُ دان لبننان ءَ وت ءَ سر ئے کہ اُد ءَ کُتگ 23 ستمبر ءَ  500 مردم ازرائیلی اُرشے ءِ زد ءَ کاینت ءُ بیران بنت۔ دو ھپتگانی تہ ءَ ازرائیل ءِ زوراکیانی پدا 2000 ءَ گیش لبنانی کُشگ بیت۔

ازرائیلی لشکر ءَ پہ گازہ ءُ کش ءُ کر ءِ مھلوک ءَ ھچ نہ اشتگ راہ ءُ دگانی سرا جُھلین کڈ جتگ اے دمگ ءِ مھلوکی ملکیت ءُ گون بمب ءُ ٹوپان مان بستگ اَنت ءُ دان مردمانی لوگ اوں پروشتگ اَنت۔ جان دُراھی ءُ وانگی آسرتی سرجم ءَ چہ مردماں پچ گرگ بوتگ اَنت۔ آپ ءِ بُنجل کہ اُد ءَ آپ جم کنگ بیت ءُ پدا مھلوک ءَ دئیگ بیت بجلی جوڈ کنگ ءِ ھند  ءُ شمسی تباہ کنگ بوتگ اَنت۔ تچک ءَ ازرائیل ءَ گازہ ءِ زمین ءِ سرا ایمنین زندے گوزینگ ءِ درستیں آسرتیانی گُٹگیر کنگ ءِ کوشست کُتگ۔پلستینی مھلوک بیھار دئیگ بوتگ اَت کہ وتی ھند ءَ یلو بکن اَنت ھمے سوب ءَ 16 درسد زمین ازرئیلیانی پنجگاں شُتگ ھمے داب ویسٹ بینگ ءَ بگر داں لبنان ءَ اے درچ برجاہ اِنت ءُ ازرائیل زمیناں گراں ءُ روان اِنت۔

مردماں گُشگ بوتگ کہ شُما دوبر وتی زمین ءَ اتک کن اِت وھدے کہ ازرائیلی لشکر ءِ لشکر کشی ھلاس بیت۔ بلے ما کُل زانیں کہ اینچو ھون ریچی تھنا اے زمین چہ واھننداں پچگرگ ءُ وتی نوک آباتی یے جوڈ کنگ ءِ ھاترا کنگ بؤگ ءَ اِنت۔ اے وڈ پیسرا اوں 1948 Nakba ( پلستینی مھلوک ءَ چہ آوانی ماتی سر ڈگار کشگ ءُ دگے جاگھان دیم دئیگ) ءِ درشم ءَ کنگ بوتگ ءُ پدا اے مھلوک دوبر یونائیٹڈ نیشن ءِ منگ نامگ ءِ سرا رازی بؤگ ءَ ابید اوں وتی زمین ءِ سرا آئیگ ءَ چہ دارگ بوتگ اَنت پمیشکہ نون پلستینی راج وتی زمین ءَ یلو کنگ ءَ ھچ وڈ ءَ جاڑیگ نہ اِنت۔ پہ دری مھلوک ءِ ھاترا پلستینی راج ءِ گون وتی زمین ءَ بندوکی ءُ سیادی ءِ پھمگ گران اِنت۔ ءُ ھاس Zionism ءِ منوگرانی ھاترا گران اِنت کہ آواں مئے مزنیں مھلوکے چہ زمین ءَ کش اِتگ کہ ما آ دگے ارب راجانی زمین ءَ برو ایں ءُ ھمود ءَ وت ءَ گار بکنیں۔ بلے ھپتاد سالانی گوزگ ءَ پد اوں دنیگتی پلستینی راج وتی زمین ءِ ھکیگیں وارسی ءَ چہ دزکش نہ بوتگ۔

اے جُست کہ پلستینی مھلوک اینچو زوراکی بمب ءُ ٹوپ کُشت کوش روزیگی نادزرسی ءَ ابید اوں وتی لوگ ءُ وتی پت ءُ پیروکی میراسیں زمین ءَ یلو کنگ ءَ پرچہ جاڑیگ نہ اَنت چی ءَ کہ گون اے زمین ءَ پلستینی مھلوک ءِ مھر ءُ بُنکی راجی پجار پیوست اِنت۔ اے تھنا زمینی یا ملکیت واھنندی جیڑھے نہ اِنت بلے یک پاکین مھر ءُ ھمگرنچی یے گون وتی زمین کہ پلستینی راجدپتر دود ءُ ربیدگ ءُ راجی یاداشت ءِ المی ئیں بھرے۔ اے پیسلہ کہ “ما وتی زمین ءَ یلو نہ کنیں” اے پلستینی راج ءِ سنچ ءُ سما اِنت کہ اے زمین ءِ یلو کنگ ءِ بزانت چہ وتی راج ءُ پدریچان سیادی ءُ ھمگرنچی ءِ سدگ اِنت۔

کِشت ءُ کِشاری چاگردے بؤگ ءِ سوب ءَ پلستینی ربیدگ ءُ مچانکی سما ءِ تہ ءَ پلستینی زمین ءِ وتی ھاس ءُ جتائین بستارے۔ اشی شرتریں چیدگ زیتون ءِ درچک اَنت۔ زیتون ءِ درچک کوھن ءُ توانگر اَنت ءُ نون اشانی روتگ چو پلستینی مھلوک ءِ داب ءَ سک جُھل اَنت۔مھلوک ءِ گون اے زیتون ءِ درچکان بندوکی ھمے داب ءَ مھکم اِنت انچو کہ گون وتی میراساں اِنت۔ زیتون ءِ رون کنگ پدا اشی ءَ چہ تیل کشگ ءُ اے تیلاں وتی مردماں گون بھر ءُ بانگ کنگ وتی ربیدگاں رکینگ ءِ کرتنے زانگ بیت۔

ھمے سوب اِنت کہ ازرائیلی لشکر ءُ آباتکاراں گیش دوست بیت کہ آ پلستین ءِ زیتون ءِ باگانی سرا اُرش بکن اَنت۔ زیتون ءِ درچکانی سرا اُرش کنگ ءُ اشان تباہ کنگ چہ پلستینی مردمانی سرا اُرش ءَ دیم ءَ ترا اِنت۔ اے پلستینی راج ءِ پجار ءِ سرا اُرش کنگ ءَ گون ھمدپیں کارے۔ ازرائیل ءِ نیمگ ءَ چہ اشان ھلاس کنگ ءِ جھد پلستینی زیتونانی ھلاپ ءَ یک جنگے ءِ درشم ءَ پدر بیت کہ 1967ءَ بگر دان 2013 ءَ کساس 800000 زیتون ءِ درچک ولگوج کنگ بوتگ۔

ماتیں سرزمین ءَ گون ھمگرنچی مئے (ھما پلستینی مردم کہ چہ پلستین ءَ ڈن زند گوازینگ ءَ اَنت) میان ءَ اوں ھست۔ منی جند زورگپتگیں ویسٹ بینگ ءِ دمگ نابلوس ءَ ودی بوتگ بلے من چہ پلستین ءَ ڈن رُستگ آں۔ اینچو جسدی دوری ءُ گستائی ءَ ابید اوں منی ھمگرنچی ءِ مارشت گون وتی زمین ءَ سرد نہ گپتگ اَنت۔ منی کھول دومی انتفادا (ازرائیل ءِ زورگیری ءِ ھلاپ ءَ ماں گازہ ءُ ویسٹ بینک ءَ پاد اتکگیں گھگیری اولی انتفادہ 1987 ءَ داں 1993 ءَ بوتگ ءُ دومی 2000 ءَ بُنگیج بوتگ) ءِ وھد ءَ بیوس کنگ بوتگ آ چہ پلستین ءَ بہ تچ اِیت۔ منی پت ءَ ازرائیلی لشکر گون وتی چمان دیستگ کہ آئی ءَ منی پیروک ءِ زمین دوز اِتگ ءُ پہ وت بُنجلے جوڈ کُتگ ئے ءُ منی مات کار جاہ ءَ رؤگ ءِ وھد ءَ ازرائیلی زورگیریں لشکر ءَ کُشتگ۔ اے مئے وتی پیسلہ نہ بوتگ کہ زمین ءَ یلو بکنیں بلے وت ءَ را زندگ دارگ ءِ جھدے بوتگ۔

گوستگین دو دھکانی میان ءَ من وھد وھد ءِ سرا پلستین ءَ شُتگ آن من زوگیر وتی زمین ءِ سرا کبزہ کنگ ءُ مردماناں چہ وتی ماتین زمین ءَ کشگ ءُ در پہ در کنگ ءَ دیستگ آن ۔ من ءَ یات بیت کہ منی کسان امبری ازرائیلیانی چندے ھسابی زور بستگیں لوگ بوتگ اَنت بلے مرچی اے کساس انچو ود اِتگ کہ اے جاگہ ارائیلیانی شھر جوڈ بوتگ اَنت نوک آباتکار ءِ اے شھراں پلستینی مھلوک ءِ میتگ چہ چاریں نیمگ ءَ انگیر کتگ اَنت۔

بلے من اوں ازائیلیاناں پلستینی زیتون ءِ باگانی سوچگ، ڈگارانی جُوانی آپ ءِ ترینگ ءُ دوزی کنگ ءَ ، لوگانی تباہ کنگ ءَ دیستگ آن ءُ من اشانی بگیری ءَ پلستینی مھلوک ءِ گھگیری ءُ جنگ اوں دیستگ۔ پلستینیاں آپی تلاپ جوڈ کتگ دانکہ کسانیں مدتے چہ بے آپی ءَ بہ رک اَنت۔ ھمود ءَ کہ چو “ھوارا” ءِ داب ءَ ازرائیلی لشکر اُرش کنگ ءَ بوتگ اَنت ءُ مردماں چہ لوگاں تاچینگ ءَ بوتگ من پلستینی ھما یکیں شپ ءَ وتی پُرشتگیں لوگانی دوبر بندگ ءُ یکے پہ دومی ءِ کمک ءَ مدام ساڈی بؤگ ءَ دیستگ آن۔

گوستگیں سال ءَ کہ ازرائیلی تشدد ءَ مھکمیں چُک چینی یے درشم زرتگ اَت بلے پلستنیانی ھمت ءُ اوشتگ ءِ جبزگ ھما ھساب ءَ مھکم اَت ءُ ھچ وڈ ءَ پروش ورگ ءَ نہ اَت۔ جینن ءَ دان گازہ ءَ پلستینی ازرائیلی اُرشانی دیمپان اَت اَنت بمب ءُ ٹوپ سگگ ءَ اَت اَنت بلے آواں وت ءَ را زندگ دارگ ءُ زورگیری ءِ ھلاپ ءَ گھگیری برجم داشتگ اَت۔

ھمینچو گیشتر کہ زورگیر پہ پلستیناں زند گوزینگ ءَ جنجالے جوڈ کنت اشی ءَ چہ گیشتر پلستینی اے زمین ءِ سرا وت ءَ زندگ دارگ ءِ ھر رنگیں بوتنی ئیں توجیل ساز اَنت۔ پہ درور آ ٹالُکی سیکل ءِ کمک ءَ پُچ شُدی مشین جوڈ کن اَنت، آ وردن جوڈ کنگ ءَ پہ  ھاک ءِ ترون اڈ کن اَنت یا جتائیں مشینانی اوزاراں جم کن اَنت ءُ پہ وت بجلی جوڈ کن اَنت۔ اے تھنا زوراکی ءِ دیم ءَ اوشتگ ءُ وتی زمین ءِ سرا ھر رنگ ءَ زندگ بؤگ ءِ چندے نیمون اَنت۔

ھمے وڈ دران ڈیھ ئیں مردم دل ءُ مجگان چہ پلستین ءَ نہ سستگ اَنت۔ ما چُکچینی گون درد، اندوہ ءُ بیم ءَ ندارہ کُتگ ءُ وھدے کہ ما وتی پناہ زُرتگیں ملکانی رھبرانی دیم ءَ اے چیز  ایر کتگ اَنت اُد ءِ رھبراں مئے جیڑہ کمار نہ کُتگ اَنت۔ روبرکتی جھان ءِ گیشتریں مردم پلستینیانی زند ءَ ارزشت نہ دئینت آ مارا وتی چمان بنیادم اوں نہ لیک اَنت۔

پلستینی مھلوک ءِ سرا برجمیں دربنیادمی (Dehumanisation) ءَ راجمان ءِ تہ ءَ بیوسی ءُ نادزرسی ءِ مارشت ودی کتگ۔بلے وھدے کہ گازہ ءِ مردم چُک چینی ءِ بیمانکیں اھد ءَ گوزگ ءَ اَنت گُڑا مئے بائد نہ اِنت کہ ما پُشت بہ کنز ایں ءُ پہ پُشت کنزگ ءَ پہ مئے گور ءَ ھچ نیست۔ مارا پلستنی مھلوک پہ اُلسی گھگیری ءَ پاد کنگی اِنت ءُ دُگنیا ءَ را ھال دئیگی اِنت کہ ما اِد ءَ ایں،  ما زندگی کنگ ءَ ایں ءُ ھما دُگنیا کہ مارا گار کنگ ءِ پُشت ءَ اِنت ما آ دُگنیا ءِ چمانی دیم سوبمند بہ ایں ءُ اے دگنیا ءِ تہ ءَ  پیش گام بہ ایں۔

مئے اے اوگام کہ “ما زمین وارس ایں” اے تھنا شائری چہرے نہ اِنت بگندئے پہ پلستینی مھلوک ءَ اے زندگیں راستی یے۔ وھدے کہ زورگیر  مئے مردماں جُست کنت “شُما پرچہ اے زمین ءَ یلو نہ کن اِت؟” ما پسو دئیں کہ “ما پرچہ وتی ماتیں زمین ءَ یلو بکنیں؟” اے پلستینی راج ءِ زمین اِنت اے زمین ما گون وتی پدریچانی ارس ءُ زگرین ھوناں سمبھینتگ۔ اے زمین ءَ یلو کنگ ءِ متلب وتی سرجمین چیزان ببا دئیگ اِنت۔ ایشی بزانت دژمن ءَ را مئے گوستانک ، مئے ربیدگ ءُ مئے مچانکی ارواہ ءِ کبر کنگ ءِ موکل دئیگ اِنت۔ اے چُکچینی ءِ نوبتاں سرجمیں سالے گوستگ بلے پلستنی انگت ھست اَنت زوراکی ءِ دیم ءَ زندگ اَنت چی ءَ آواں ھر ھال ءَ زندگ بوگی اِنت ءُ اے زمین ءِ سر ءَ مانگی اِنت۔