کتاب
: بلوچستان نا مسئلہ
مصنف: ڈاکٹر عنایت بلوچ
براہوی مٹ و جاچ: اختر بلوچ
بلوچستان، اونا مسئلہ و علاقہ
نا بابت ئٹ پٹ پول نا مسخت بلوچ راجدوستی و تینا آجوئی نا کوشست و تینا چاگڑدی
دیہاڈ نا واقعہ آتے اُرن تاکہ ننے سَما تمے کہ بلوچ راجدوستی نا بُنداو امر و ہراکان
بسنے ۔ انت حالیت آک بلوچستان نا زِی آ گدرینگانو
و پیشن نا ریاست آتا انت فاہدہ غاک تفوکو دا ڈغار تون ، ہراڑا ہر وخت قوضہ کننگ
نا کوشست برجا مسنے۔ اوغستان ، ایران، برطانیہ،پاکستان و پیشن نا بِدر آ قوم آک ،ریاست
آک ہر وخت بلوچستان آ جلہو کرینو یا دا قوم و ڈغار ءِ پِرغِنگ نا کوشست کرینو ولے ہر
وار بلوچستان تینا زِی آ مروکا ظلم ئنا برخلاف جت پت/ مزاحمت کرینے و اینو ئسکان مزاحمت
ءِ برجا تِخانے۔
بھاز آ قوم آک تینا قومی ریاست
آن مُر ءُ۔ اوفتا ریاست نا آخُبت نا جیڑہ اوفتا راجدوستی تون تفوک ءِ۔ اسہ قوم
و اونا راجدوستی نا جُہد اسہ دیہاڈ ، دنگ،سیم و زبان نا بُنداو آ چاہِنگک ۔ دُنکہ سٹورٹ
مل پاہک کہ آبادی نا اسہ بشخ قومیت ئٹی ءِ ولہ اوفتا اُستخوائی اسٹی و اواری مرے پین
ہچ ئس آبادی نا نیام ئٹ اوار مَف ۔ او تینے اسہ حکومت نا وڑ ئٹ جوڑ کیر و راج کیر۔ہندُن
بلوچ قوم تینا راجدوستی و راجی ریاست کِن جہد کرینے ، دُنکہ اولی وار قوم ءِ اسٹ کننگ
کن ریاست نا بنداو ءِ شاغنگ و مونی راج ءِ اسٹ کننگ کن جہد ءِ برجا تِخنگا ۔ دا جہد
ئٹ محمود اول، نوری نصیر خان ، خان مہراب خان شہید ، یوسف عزیز مگسی ، عزیز کرد نا
پِنک ننا مونا بریرہ ۔ بلوچ ڈیہہ ئنا کل رقبہ 340000 مربع میل مسنے ہراڑے او قبیلہ
آتا دروشم ئٹ کرن آتیان آباد مسنے۔
1920ء ئٹ اگہ نن اُرن بلوچستان نا سیاسی گل آتا مسخت نسلی بنداو آ بلوچستان
نا آجوئی و اسہ سیوت ئس جوڑکننگ ئس ۔ 1932 ئٹ قوم پرست گل آتا جیکب آباد ئٹی اسہ مچی
ئس مس ہراڑے بلوچی زبان ئٹ خواننگ و خوانفنگ نا خواست ءِ کریر ہندُن
1933 ئٹ عزیز مگسی ڈیرہ غازی خان و سندھ نا علاقہ آتے بلوچستان ئٹ اوار کننگ نا کوشست
و خواست کرے۔ میر گل خان نصیر جنرل سکریٹری ریاست قلات نیشنل پارٹی نا نیمہ آن اپریل
1946 ئٹ مضمون ئس چاپ کیک ہراٹی او پارے کہ بلوچستان نا قومی و سرکاری بولی بلوچی مرے۔
اگست 1947 ئٹ آجوئی آن پد بلوچستان نا راجی بولی بلوچی مس۔ گڑا جناح راجی فکر تخوک
آ صوبہ آتے اسلام مخالف و پاکستان مخالف قرار تِس۔ 1948 ئٹ پاکستان زوراکی ئٹ بلوچستان
آ قوضہ کیک و بلوچ اُلس ہموتم تینا بولی آن مُر بِٹنگک و بلوچی جت بتی شہزادہ
عبدالکریم نا کماشی ٹی بِنا مریک۔ ہموتم اوفتا کُنڈان دا ہیت مونا بریک کہ قوضہ
گیر ننا بلوچ قوم نا لُمئی دوی، دود و ربیدہ ءِ ایسر کننگ خواہک ولے نن تینا دود و
ربیدہ و تینا زبان آتا و تینا ڈغار نا گڈیکو وخت ئسکان رکھ ءِ کرون۔
اگہ بلوچ راجدوستی و دیہاڈ ءِ اُرن
گڑا ہر دورباری ٹی بلوچ آ بیدادی مرسہ کرینے ۔ او خُڑک ئنا علاقہ تے آ ہمپینے
و جنگ کرسہ کرینے ۔ دُنکہ ایرانی دیہاڈ ئٹ نوشیروان نا مثیل ننا مونا ٹی ءِ
۔بلوچ دیہاڈ ئٹی سیاءسوار بلوچ نا وڑو کماندار آتا مثیل خننگ ئٹ بریک ہرا بلوچ قوم
ئکن گام ہرفینے و او اولی بلوچ ءِ کہ ہرامسلمان مسنے۔ دوانزدمی کرن ئٹ میر
جلال خان نا کماشی ٹی 44 قبیلہ سیستان آن مکران آ بسر ، دا ہمپ و بِٹ نا باروٹ
ننے دیہاڈ ئٹ شاعری نا دروشم ئٹ زیات چاہنداری مِلک۔ ہندُن اوفک مونا تینا وفاق ءِ
جوڑ کننگ نا کنڈ آ گام خلسہ کریر ۔ ہرافتیٹی ریاست مکران مرے، ڈیرہ جات نا دودائی وفاق
مرے یا وفاق قلات/بلوچ خانیت مرے۔ بلوچ خانیت اولی بلوچ ریاست ءِ ہرا تیوہ بلوچ
قوم و علاقہ آتے مثیل دُنکہ مکران، مغربی بلوچستان ،ڈیرہ جات،سیستان،لسبیلہ ءِ اوار کرینے و اسِٹ ءُ خان ئسے نا کماشی ٹی حکومت
کرینے ۔ 1666 ئٹ میر احمد خان اول خانیت نا بنا ءِ کیک و وفاق نا سیم و دنگ آتے بَھلُن کیک۔ میر عبداللہ اولی خان ءِ ہرا
نا کماشی ٹی اسہ بیرک ئسے نا سیخا ٹی تیوہ بلوچستان ءِ اسٹ کیک او خانیت نا سیم آتے
جنوب مغرب ئٹ بندر عباس، مشرق ئٹ ڈیرہ جات و شمال و مشرق ئٹ قندھار آن خُڑک کیچ او
لسبیلہ ئسکان اسٹ کیک ۔ نوری نصیر خان نا خانیت
بھاز گچین و سوگو گدرینگانے ہراٹی ریاست ئٹ فوجی و بست و بند ادارہ آتا بنداو
ءِ شاغک۔ بلوچستان 1757ء ئسکان اوغستان نا حکمران نا پابند ئس۔ نوری نصیر خان
1758ء ئٹ تینا آجوئی نا پڑو ءِ کیک۔ ہرا نا سوب آن اوغستان و بلوچستان نا نیام
ئٹ جنگ و جیڑ مریک۔ ولدا ہڑتوماتا نیام ئٹ معاہدہ ئس دستخط مریک ۔ ہمو معاہدہ ءِ
معاہدہ قلات یا معاہدہ عدم مداخلت پاننگک ، ہرا نا ٹک اک دن ءُ ۔
1۔ خان بلوچستان نوری نصیر خان اوغستان
نا شاہ ءِ ہچو خراج/زر تِفرو۔
2۔ خان بلوچستان شاہ اوغستان ءِ فوجی
کمک تِفرو ہموتم ئسکان کہ اوڑا پیشن نا کسس جلہو کپ ۔ اگہ پیشن ناک جلہو کریر
گڑا اودے کمک کرو ہرا نا ایوض ئٹ خان بلوچستان ءِ سالانہ اسہ لکھ
کلدار و فوجی سلاہ رسینگک۔
3۔ ہڑتوما کنڈان باغی مروکا
بندغاتے باہوٹ تروئی اف۔
4۔ شاہ اوغستان بلوچستان نا مسلئہ غاتیٹی
ہچ بِٹپرو تینے۔
5۔ خان بلوچستان نا اخس علاقہ شاہ اوغستان
تون ءُ اوفتے پدا بلوچستان ئٹ اوار کننگے۔
نصیر خان نا وخت ئٹ اونا ریاستی بست
و بند و علاقہ غاتا حالیت آک ،قبائل آتا نظام ، فوجی نظام، ڈغار آتے آ زمینداری و پیشن
نا تا پالیسیک بھاز جوان مریرہ۔ راجی بیرک خیسن و گونکّی رنگ ئنا ئس مریک۔راجی بولی
بلوچی مریک ولہ درباری و نوشتہی زبان فارسی مریک ۔ پیسہ نا پِن شاہی ناصر یا کرم شاہی
مریک۔ اوڑان پد محمود خان بریک و جوان ءُ وڑ ئسے ئٹ ریاست ءِ سامبھنگ کپک۔ ولدا
1817 ٹی میر محراب خان ریاست نا خان مریک۔ ہمو وخت ئٹی پین خُڑک ئنا علاقہ آتیٹی مزہبی
و علاقائی جھیڑہ و جنگ اتا لَڑ ئس برجا مریک ۔ ہندا وخت ئٹ برطانیہ ہم ہندوستان آن
برسہ بلوچستان و افغانستان ٹی جاسوس آتا دروشم ئٹ سر کیک تینے۔ برطانیہ نا اولی جاسوس
غلام سرور ءِ بلوچستان و افغانستان آ 10مارچ 1793 ئٹ لکھنؤ آن رائی کننگک۔ ارٹمی وار
جاسوسی کِن 10 -1809 ئٹ لیفٹیننٹ پوٹینگر ہرا تینے "حاجی" و
"ہُلی" نا سوداگر ئس پائک ، بلوچستان و سندھ آ بریک ۔ کیپٹن کرسٹی
تینے سید ئس جوڑ کیک و سیستان آ بریک ۔ کیپٹن گرانٹ ءِ مکران و بلوچ ساحل آتا
نیمہ آ رائی کیرہ ۔ الیگزینڈر برنز ڈیرہ جات و اوغانستان آ جاسوسی کننگ کن سفر
کیک۔ ہندا وخت ئٹ خان قلات و برطانیہ نا نیام ئٹ جنگ و جھیڑہ زیات مرسہ کیک و
انگریز 13 نومبر 1839 ئٹ بلوچستان آ اسہ جنگ ئسے آن پد قوضہ کیک ۔جنگ ئٹی شہید خان
مہراب خان تینا سپاہی تیتون اوار شہید مریک ۔ انگریز تینا مکر و چم آتا کمک ئٹ بلوچستان
ءِ پِرغک و راج کیک۔ سنڈیمن نا نظام دُنکہ جرگہ، لیوی،قبائلی نظام ءِ جوڑ کننگ و حکومت
کننگ۔
بلوچستان نا سیاسی و آئینی بستار آ نظر ئس شاغن گڑا خننگ ئٹ بریک کہ اونا
ہندوستان و ایلو ریاست آتیتون ہِچ ءُ تعلق اَف۔ 1920 و اوکان مُست قوم پرست بلوچ
آتا گپ و جُہد ہندا ئس کہ بلوچستان اسہ آجو ءُ ڈیہہ ئسے۔ 1935 ئٹ میر احمد یار خان
پاریکہ کہ بلوچستان اسہ جِتا ءُ ریاست ئسے اودے ہندوستان نا بشخ کپس۔ اگست 1947 ئٹ
بلوچستان آجو مریک و پانزدہ اگست آ میر احمد خان عوامی جلسہ سے ٹی بلوچی زبان ئٹ گپ
وتران کرسہ پائک کہ کنے اینو فخر ءِ کہ اینو تینا زبان ئٹ گپ کننگُٹ و مونا ہم کرسہ
کروٹ انتۓ کہ دا کنا زبان ءِ و داسہ ننا ڈیہہ آجو مسنے ۔او تینے بلوچ آن بُڑزا تکِتو
و پارے کہ ای قوم ئنا خزمتگار ئسے اُٹ ۔ تقریر آن پد بیرک بڑزا مَس ۔ ہندا تُو
ئٹی آئین ہم جوڑمس ہرا نا مُسہ بشخ ئسر ، اولی خانیت نا حد و قانونی بشخ ئس،
ارٹمی خانیت نا انتظامیہ ، مسٹمی مقننہ ئس۔ مقننہ دا وڑ ئٹ ئس ؛
1۔۔ دارالامرا ( ایوان قبائلی سرداران
یا ایوانِ بالا )،
2- دارلعوام(ایوان عام یا ایوان زیریں).
دا کان بیدس 1948 ئٹ پاکستان
کوشست کیک کہ بلوچستان ءِ تینا بشخ جوڑ کیو ولے بلوچستان اوڑتون اوار مفک ۔ خان
و جناح نا نیام ئٹ بلوچستان ءِ پاکستان ئٹ اوار کننگ نا زی آ بھاز گپ او تران مریک
ولہ بلوچستان اوار مفک ۔ ہندُن بلوچستان نا ایوان بالا و ایوان زیریں ہم اواری ءِ منپسہ۔
گڑا گڈیکو وخت آ دن مریک کہ پاکستان بلوچستان آ جلہو کیک و زوراکی ئٹ تینتون اوار کیک
تا۔ ہراڑان گُڈ جت پت و جنگ بناء مریک ہرا اینو ئسکان برجا ءِ۔
بلوچ قوم تینا
زند ءِ انت وڑ ئٹ گدریفینے ڈاکٹر عنایت بلوچ تینا دا کتاب ئٹی نوشتہ کرینے۔ داکان بیدس
بلوچ ہراکان بسنے، امر بسنے اونا دا ڈغار تون انت خُڑکی ئسے، ہرا وخت ئٹ داڑے بلوچ
بسنے و بلوچ نا زِی آ ہرا قوم آک، بادشاک حکمرانی کرینو ۔ بلوچ قوم اوفتیتون امر رہینگانے
یا جنگ کرینے ۔ بلوچ قوم ئنا زُبان آتا باروٹ ہم نوشتہ کرینے ہرا شاعراک شاعری کرینو
و زبان آتا انت گُرج ءِ ۔ بلوچ قوم ئٹی دود و ربیدہ، حال و احوال، پوشاک، بلوچی غیرت،
بلوچی معیار، بیر یا خون، باہوٹ، مہمانی،میڑھ،بھروسہ، قول، شغان دا بلوچ قوم ئٹی انت
بستار تخرہ دافتا باروٹ سرجمی ئٹ نوشتہ کرینے ۔ ہندن بلوچستان نا نیام ئٹ پین
انت انت معاہدہ مسنے و ہرا قوم و ریاست آتیتون مسنے۔ دا قوم پیشن نا راج آتیتون
امر زند ءِ تیر کرینے۔ داڑے اگہ مغل، اوغستان ، ایران، انگریز و پین چندیک بسنو یا
داڑے تینا جند ئنا علاقہ آتیٹی تین پہ تین امر رہینگانو۔اوغستان، ایران و انگریز نا
نیامٹ پین انت انت معاہدہ مسنو دافتا باروٹ ہم نوشتہ کرینے۔
