بلوچ چکچینی ءِ اِنفرا اِسٹکچرل پھنات: اسلام بلوچ

‎ بلوچ چکچینی ءِ اِنفرا اِسٹکچرل پھنات
اسلام بلوچ

‎گلامیں راجانی تہ ءَ مرگ اَبرمی چیزے نہ اِنت ۔ ھمے کہ یک زورگیرے یک اِستانے یاکہ راجے گلام جوڑ کنت ~~گڑا~~گڈاں پرائی واستہ ھمے چاگرد ءِ ھندی مردم مانا نہ دارنت بلکیں ھما زمین ءُ آھیءِ سرے سائل ءُ وسائل ءُ اے دیگہ نیچرل ریسورسز مانا دار اَنت ۔ زورگیر گلامیں راج ءِ راجی پجارءِ ھلاس کنگ ءُ راجی یکمشتیءِ بھر ءُ بانگ کنگ ءِ ھاترا وڑ وڈیں پندل ءُ گپتمان سازیت کہ ھمے راج ءِ یکمشتی ءُ یکجھتی ءَ ھلاس بہ کنت ءُ آئی ءِ سرا واجھی بہ کنت ۔ زورگیر گلامیں راج ءِ لس مھلوک ءَ پہ وڑ وڑیں شوربندی اَڑ دنت کہ مردمانی چکچینی ءَ بہ کنت ،اَنچوش کہ اچیل ایمبیمبے ءِ نیکروپولیٹکس ءَ بچاریں گڑا مارا ھمے گندگءَ کئیت کہ ایردستیں چاگرد ءِ نیام ءَ ھندی مردمانی مرگ ءُ زند ءِ رھبند ءَ زورگیر گشین ایت ءُ مرگ ءِ سیاست ءِ نیام ءَ ھما مردم پشکپیت کہ آ وتی مرگ ءِ فیسلہ ءَ وت کنت ۔

‎اگاں ما بلوچ راجمان ءِ تہ ءَ بچاریں مارا وڑ وڑیں اِستان ءِ پندل دیم ءَ کاینت کہ چرائی ءَ چہ بلوچ مھلوک چوں مرگ ءِ دیمپان بوھگ ءَ اَنت ۔ چوکہ پیک انکاؤنٹر ءِ رنگ ءَ بہ بنت ، دگ ویلے ءِ رنگ ءَ بہ بنت ، نادراہ جاھاں درمان ءُ ڈاکٹر ءِ نہ بوھگ بہ بیت ، یاکہ اے دگہ راھبند بہ بنت کہ اِستان ءَ بلوچ مھلوک ءِ چکچینی ءَ سازتگ اَنت ۔

‎اگاں ما اِستان ءِ انفرا اِسٹکچرل شوربندی ءَ بچاریں کہ چرائی ءَ چہ بلوچ ءِ چکچینی بوھگ ءَ اِنت گڑا مارا ھمے چیز گندگ ءَ کئیت کہ 1948 ءَ بگر داں روچ ءِ مروچی اِستان ءِ نیمگ ءَ یک چوشیں شوربندی یے دیم ءَ نہ یتکگ کہ آ بلوچ ءَ را یک جوانیں زندے گوازینگ ءِ موہ ءَ بہ دنت ۔ پاکستان ءِ اے دگہ جاھاں بچاریں گڈاں مارا ھر صوبہ ءَ مزن مزنیں دگ ، نادراہ جاہ ، زانشتجاہ ءُ اے دگہ شوربندی گندگ ءَ کاینت کہ آ مھلوک لس آسراتیاں جوانیں رنگے پیلو کن اَنت بلے بلوچستان ءَ اے بنکی لوٹانی آسراتی ھم گندگ ءَ نیاینت اگاں یک اِستانے بہ لوٹ ایت پرائی ءَ اے کسانیں جیڑہ اَنت کہ گیشءُ گیوار کنگ بہ بنت بلے گپ پدا ھما کہ گلامیں راجمان ءِ تہ ءَ لس مردماں شان ءُ شرپے نیست ۔ بلوچ ءَ را وتی واستہ وت راہ ءُ رھبند جوڑ کنگی اَنت۔

‎اگاں ما انفرا اسٹکچرل دگانی سرا بیائیں گڑا مارا ھمے گندگ ءَ کئیت بلوچستان ءَ چوشیں یک روچے نیست کہ دگانی سرا ویل مہ بنت ۔ بلوچستان ءِ دگ ھون وار جوڑ بوتگ اَنت کہ ھمک روچ مردم وتی اَجگیں واھشتاں کل کن اَنت ۔ ماں بلوچستان پوسٹ ءِ 8 اپریل 2024 رپورٹ ءِ رد ءَ 538 کھول چرے دگ ویلاں سانمند بوتگ اَنت ءُ 212 دگ ویل بوتگ ، چریشاں چہ 121 مردم بیران بوتگ ءُ 417 مردم زدگ بوتگ اَنت ۔ ( اے تھنا سے ماہ ءِ رپورٹ اَنت ) اے اِستان ءِ تھنا بےسوبی نہ اِنت بلکیں اِستان ءِ سسٹمیٹک جنوسائیڈ اِنت کہ بلوچ مھلوک اِشیءِآماچ اِنت ۔

‎دومی نیمگ ءَ ما اِستان ءِ اے دگہ انفرا اِسٹکچرل چکچینی شوربندی آں بچاریں گڑا 28 مئی 1998 بلوچستان ءِ دمگ چاغی ءَ نیوکلیر ٹیست ءَ مزنیں سانے دور داتگ ۔ چرے نیوکلیئر ٹیسٹ ءَ بازیں مردمے کینسر ءُ اے دگہ نادراھیانی آماچ بوتگ اَنت ۔ اَنچوش گندگ بیت کہ داں روچ ءِ مروچی راسکوہ ءِ مردم وڑ وڑیں نادراھیانی آماچ اَنت ۔ ایشانی مستریں سوب ھمے الٹرا وائلٹ ریز اَنت کہ چرے نیوکلئر ٹیسٹ ءَ دراتکگ اَنت ۔ آ نوک ودی بوتگیں گونڈو بہ بنت یاکہ جوان ءُ پیر ۔

‎اگاں اے نیمگ ءَ ڈی جی خان ءِ یورینیم کمپس آں ادا ھم اِستان ءِ ھما شوربندی گندگ ءَ کاینت کہ چریشاں لس مھلوک مرگ ءُ زند ءِ نیام سپر کنگ ءَ اَنت ۔ کوہِ سلیمان ءَ یورینیم 1960 ءَ درگیجگ بیت ءُ 1977 کار بنگیج کنگ بیت ، اے وھد ءَ کوہِ سلیمان ءِ ھشت یورینیم کیمپس اَنت ءُکہ دگہ دگہ دمگان جوڈ کنگ بوتگ اَنت ۔ ھکومت ءِ نیام ءَ ھچ چوشیں راھبندے گیشینگ نہ بوتگ کہ چرائی ءَ چہ مردم ایشاں چہ دراتکگیں ریڑیئیشنزاں پھریزگ بہ بنت ، ھمے یورینیم میتگانی نزیک ءَ اَنت کہ چرے ریڑئیشنز آں مھلوک شومک ، گٹّگ ، پُپ ، جگر ، پوست ، چم ءُ اے دیگہ نادراھیانی آماچ بوھگ ءَ اَنت ۔ شومک مروچی بلوچستان ءِ تہ ءَ ھما کار ءَ کنگ ءَ اِنت کہ ھمے کارا دژمن ءِ توپک ، بمب ءُ ٹوپ کنگ ءَ اِنت ۔ کوہِ سلیمان ءِ دمگ رونگھن ءَ چوشیں یک گِسے نیست کہ ھودا شومک ءِ نادراہ نیست ھمک گِس چرے شومیں نادراھی ءِ ھرجان اِنت ۔ بژن ءِ گپ اِیش اِنت توامیں کوہِ سلیمان ءَ شومک ءِ نادراہ جاہ وتی جاہ ءَ بلکیں یک ھم نادراہ جاہے نگواہ ایت ۔ سرجمیں بلوچستان ءَ ھم چوشیں چیزے گندگ ءَ نئیت ۔

‎پدا ما ھمے اِستانی شوربندی آں بزوریں دو سال ساری مارا ھمے چیز گندگ ءَ کیت کہ بلوچستان ءِ دمگ ڈیرہ بگٹی پیرکوہ ءَ ساپیں آپ وتی جاہ ءَ بلکیں آپ ءِ نہ بوھگ ئے سوب ءَ چہ مزنیں کساسے مردم مرگ ءِ ارجان بنت ۔ اے یک المیہ ءَ چہ کمتر نہ اِنت۔ بیست یکمی کرن ءَ ھم مردم بے آپی ءَ مر اَنت ءُ مردماناں آپ پہ ورگ ءَ نیست ۔ نیوز انٹرونشن ءِ رپورٹ ءِ رد ءَ 920 مردم پیرکوہ ءَ کولیرا ءِ سوب ءَ بیران بوتگ ۔ اے ھما کساس اِنت کہ دیم ءَ اتکگ ھما کہ دیم ءَ نہ یتکگ آ باریں چنکس اَنت ۔ کوہِ سلیمان ءَ یورینیم ءُ ڈیرہ بگٹی ءَ چہ سیوی گیس پاکستان ءِ درستیں جاھاں سر بوھگ ءَ اِنت بلے پہ بلوچ ءَ بنکی آسراتی اسکول ءُ نادراہ جاہ نہ گواہ ایت ۔

‎اگاں ما بلوچستان ءِ دمگ آواران ءِ 2013 ءِ زمین چنڈ ءِ درور ءَ بزوریں گڑا ھمے چیز گندگ ءَ کیت کہ اے ھم اِستان ءِ شوربندیانی نہ بوھگ اِنت کہ زمین چنڈے بلوچستان ءِ یک مزنیں دمگے زمین جمب کنت ۔ مردمانی گشگ ءِ ردا زمین چنڈ ءَ چہ کولواہ ءُ آواران اوشتاگیں لوگ نہ بوتگ سرجم ءَ زمین جمب بوتگ اَنت بلے اِستان ءِ نیمگ ءَ چہ یک چوشیں کارے گندگ نہ بوت کہ مھلوک ءَ آسراتی بہ دنت ۔ ھمے زمین چنڈ ءَ چہ مزنیں کساسے ءَ مردم بیران بنت ۔

‎اگاں ما اے نیمگ ءَ بیائیںءُ نادراجھانی نیمگءَ چمے درشان بہ کن ایں گڈاں مارا ھمے چیز گندگ ءَ کیت کہ سرجمیں بلوچستان ءَ اگاں یک مردمے ءَ را تپ ءُ کلّگے بہ بیت آ پہ علاج ءِ ھاترا کراچی ءُ اے دگہ مزنیں شھراں رونت ۔ اے وڑیں کیس سک باز گندگ ءَ کئیت کہ زالبول پہ چک ءُ مات بوھگ ءِ وھد ءَ نمیران بوتگ اَنت کہ ڈاکٹر نہ بوتگ ۔ اے وھد ءَ دنیا ءِ اے دگہ اِستانانی تہ ءَ ڈینگی یک پشّگے ءِ بستار ءَ زانگ بیت بلے اے وھد ءَ کیچ ءِ دمگ تُربَت سرجم ءَ ڈینگی ءِ آماچ اِنت کساس دہ مردم ءَ گیش پرے زوتاں بیران بوتگ ۔ اَنچو کہ سنگت رگام بلوچ وتی نبشتانک ” زانسراں داں کبر ءِ سرون “ ءَ نبشتہ کنت کہ کول ءِ سنگت زاھر ءَ ”بلوچ اگاں مرچی اے اِستان ءِ تہ ءَ سیاه تپ ءَ چہ مِریت، آئی ءِ زمہ وار ھم پاکستان اِنت ۔”

ما اگاں بچاریں بلوچستان ھما جاگہ اِنت کہ ھودا پہ لھتیں کلاک ءِ ھور ءِ گوارگ ءَ پہ میتگ زیرآپ بنت ، ایشی ءِ مستریں درور 2023 ءِ موسمی ھورانی سوب ءَ ڈی جی خان ، ڈیرہ بگٹی ، نصیرآباد ڈویژن ، لسبیلہ ءُ بلوچستان اے دیگہ ھند ءُ دمگ کس باز سان مند بوت اَنت ۔ اگاں گوستیگیں دو ماہ ءَ ساری گْوادر ءَ اتکگیں سیلاب ءَ بچاریں گڑا مارا ھمے چیز گندگ ءَ کیت کہ گْوادر ءِ وڑیں شھرے کہ سے نیمگ ءَ تیاب اِنت ءُ انگت دو کلاک ھور ءَ زیرآپ بیت ۔ ھمے سیلاب ءَ چہ بازیں جاھمنندانی گِس کپتگ ءُ آھاں پہ نندگ ءَ جاہ نیست ، بازیں مردمانی روزگار آپ ءَ برتگ ءُ یکدار ءُ راچن کہ بازیں مردمانی لاپ بوتگ اَنت اے ھم زِرّ ءَ زیر آپ کرتگ اَنت ۔ بی وائی سی رد ءَ گْوادر ءِ بازیں کساسے مردم نفسیاتی نادراھیانی آماچ اَنت ۔ اے درست ھما ردیں انفرااِسٹکچرل شوربندیانی سان اَنت گْوادر ءِ وڑیں شھرے کہ آ سی پیک شھر گشگ بیت ، اِستان گش ایت دبئی ءُ سنگاپور جوڑ بیت بلے گوادر ءِ بلوچ مھلوک ءَ را آپ پہ ورگ ءَ نیست ۔ دو کلاک ءِ ھور ءِ گوارگ ءَ پد مردم کٹی زور اَنت ڈنّ ءَ در کاینت ۔

‎اے درستیں چیزاں چارگ ءَ پد ھمے چیز پدر بیت کہ اِستان ءِ او بلوچے سیادی تہنا ایردست ءُ زورگر ئیگ انت ءُ اے راستی کہ بلوچ اے خطہ ءِ تہا یک گُلامیں راجے ءُ گُلامیءِ الت امیش انت ۔ بلوچ ءَ ھم زوت پہمگی انت کہ اے اِستان ءِ کرّا منی کد ءُ بستار چی اِنت ؟ اے سرجمیں چکچینی شوربندی آں چہ ھمے چیز پدر بیت کہ بلوچ مھلوک ءَ بستار نیست اگاں زوگیر ءِ کرّا بستارے اَست گڑا آ بلوچ ءِ مال ءُ مڈّی ، زمین ءُ اے دیگہ ھریدیں شے آں ۔ اے کُلیں چیز بلوچ ءِ چکچینی ءِ راھبند اَنت ۔ زورگیر لوٹ ایت کہ کُشگ سرجم بہ مانیت پمیشکہ آ پدّریں شوربندی آں ابید اَنچیں شوربندی دیم ءَ کاریت کہ چریشی ءَ بلوچ ءِ چکچینی برجم مان ایت ۔ بلوچ راج ءَ را اے چیز وتی مارشت ءُ جوزگ ءَ اِیر کنگی اِنت کہ زوگیر بازیں وڑ ءُ ڈولاں گوں بلوچ ءِ چکچینی ءَ کنگ ءَ اِنت ءُ بلوچ اے چیز ءَ وتی زھن ءَ اِیر بہ کنت کہ ھما چیز کہ چریشی ءَ بلوچ مھلوک مرگ ءِ آماچ بوھگ ءَ اِنت آ بلوچ چکچینی ءِ شوربندی یے ۔ یاکہ آ ٹوپ ءُ بمب بہ بنت ، گار ءُ بیگواہ کنگ ءُ زندانی کنگ بہ بیت ، انفرااِسٹکچرل راھبند بہ بیت یاکہ اِیران ءُ پاکستان ءِ وتی ما وتی ٹوپ جنکائی بہ بیت کہ چریشی ءَ بس بلوچ ءِ زندمان ءَ ابید دوئیں اِستانانی پُٹے ھم توان بھر بوھگ ءَ نہ اِنت ۔

زورگیر مدام ایردست ءَ کُشیت بلے انچیں پرویگنڈہ کنت کہ ایردست اے مرگاں اَبرمی بہ لیک ایت مارا وتی مردُم سرپد کنگی انت تو ھر وڑا مِرے تی کشندہ استاں انت آئی ءِ مشینری انت مرچی اگاں ریسرچ کنگ بہ بیت اِے گپ پدر بیت کہ ریاست ءَ گوں وتی سوفٹ کارنر جنوسائڈ بلوچ گیشتری مردُم کُشتگاں یا کہ paralised کُتگ انت ، اگاں مارا وتی راج سرپد کنگ انت گُڈا مار ءَ گیش ءَ چہ گیش زورگیر ءِ شوربندی وانگ ءُ پھمگ لوٹ انت دانکہ ما راج ءِ مردُماں رکینت کُت بہ کناں

سوفٹ کارنر سکا ھترنکایں شوربندیءِ اگاں ما لوٹاں کہ زاھر گونگیں ورنا بہ رک انت گُڈا مارا وتی مھلوک educate کنگی انت دانکہ ما اجتماعی دروشمءَ زورگرءِ دیما اوشتات بہ کناں ۔

بلوچ چکچینی ءِ اِنفرا اِسٹکچرل پھنات: اسلام بلوچ