غسان کنافانی نا اسہ گونڈ ءُ یاتگیری ئس | معاویہ بلوچ

غسان کنافانی نا اسہ گونڈ ءُ یاتگیری ئس

نوشتہ : دیدان شیشان

براہوئی مٹ:   معاویہ بلوچ

نوٹ: (دا نوشت لیٹریچر حب سائیٹ آن ارفنگانے او براہوئی ٹی مٹ مسون ء)

"فلسطینی جہڑہ بیرہ فلسطینی تا جہڑہ اف، ولے ہر اسہ آشوبی کن ءِ, ہراڑے کہ مرے دا جہڑہ  ننا دور ئٹی لٹ و پل نا برخلاف ؤ بے وس آ الس کن ءِ."

(غسان کنافانی)

غسان کنافانی، فلسطین نا اسہ جت بتی(مزاحمتی) نوشتہ کار ؤ آشوبی سیاستدان ئس اسکہ ہرا 1972 ٹی کہنگ آن مست عرب جہان نا غٹ آن پنی آ افسانہ غاتے جوڑ کرے، او ہندا دے آ 1936 ٹی آکّہAkka)  (فلسطین ٹی ودی مس۔

 1948 نا نیام ئٹ نقبہ ٹی، کنافانی ؤ اونا تیوہ غا خاہوت چندی تے آنبار تینا جند ئنا اُرا تے آن بدر کننگار ؤ زوراکی ئٹ جلاوطن مننگ کن بےوس کننگار، لبنان ئٹ گونڈ ءُ ساعت ئسے کن پناہ النگ آن پد دمشق ئٹ جہی مس، ہراڑے غسان ءِ تینا ثانوی تعلیم ءِ پورو کروئی ئس ؤ UNRWA درس ؤ تدریس نا سند الوئی ئس۔ اوکان گڈ او ہمپوک آتا کیمپ ئٹ استاد نا دروشم ئٹ کاریم کرے، ؤ  تینا فلسطین نا ورنا غا نودربر آتے وخت ئنا حالیت آتا ڈول ئٹ جوڑ کننگ کن تینا اولی گونڈ ئنگا قصہ غاتے نوشتہ کرے۔

 

1952 ٹی کنافانی یونیورسٹی آف دمشق ئٹ عربی ادب نا خواننگ ءِ بنا کرے، ولے اوکان پد او پان-عرب قوم پرست گل مومنٹ آف عرب نیشنلسٹز(MAN) تون سیاسی خڑکی ؤ سیالی نا سوب آن کشنگا، کہ ہرا ٹی اودے فلسطینی مارکسی سیاستدان ؤ طبیب جارج حبش اوار کریسس۔

1961 ئٹ او انّی ہووَر تون برام کرے، ہرا ڈینمارک نا باتی ئس اسکہ ؤ خوانفنگ نا کاریم تون اوار چنا تا حق آتیکے توارچست کروکا کارکن تیان اسٹ ئسکہ، ہراڑان غسان نا اِرا چنا فیاض ءُ لیلیٰ ودی مسُر۔ 1960 نا دہائی نا نیام ئٹ  افسانہ نوشتہ کننگ تون اوار کنافانی وخت وخت تخلص آن پان-عرب نیشنلزم ءِ اِلنگ آن ؤ فلسطینی آشوبی جہد نا نیمہ غا ہِننگ آن مست (MAN) تون سیالی تخوکا شینکاری تیکن نوشتہ کریسہ کرے۔

 او نا افسانہ غاتا گچین آ کاریم, گونڈ ئنگا قصہ غاتا مجموعہ Men in th sun پنی آ کتاب 1962 ٹی اسہ بھلو کچ ئس نغدی تعریف نا رد ئٹ شینک مس، دا نا عنوان والا ناول مسہ بے ارا فلسطینی نرینہ غاتا ہیب کیب ئٹ پیری کیک ہرا عراق نا باہوٹی آ کیمپ آتیان کویت کن مون کیرہ ہراڑے اوفتے تیل نا زیات مننگ نا سوب آن کاریم رسینگنگ نا اومیت مریک۔ جنسیت،نرینئی، بے بنداوی، جلاوطنی ؤ نسخان نا موضوع تا پٹ ؤ پول ءِ کرسہ "Men in the Sun" شست سال آن جدید عربی فکشن نا غٹ آن زیات صِفَت نا لائخ ؤ زیات نقل مروکا کاریم تے آن اسٹ ءِ۔

"Men in the sun"  آن پد ناول آک 

"All that's left to you"

(اسہ زیات باضابطہ ءُ کاریم ئسے ہرا ٹی کنافانی غزہ ٹی اسہ ایلم ءُ ایڑ ئسے نا کڑمب ءُ  عکس ئس ؤ ریک ئٹ ایلم نا ڈوہکیا ءُ وڑ ئسے ئٹ فرار مننگ نا عکس ءِ  کشانے) ءِ 1966 ئٹ نوشتہ کرے۔

 اوکان گڈ Returning to Haifa (اسے دڑدی ءُ سیاسی تمثیل ئس ہراٹی اسہ فلسطینی برامی ءُ جوڑی ئس دا گواچن تون معاہدہ کننگ نا کوشست کیرہ کہ اوفتا پنچ توہ نا چنا، اسہ مار ئس ہرادے اوفتے 1948 ئٹ حیفہ ٹی اُرا ٹی الِنگ کن بے وس کنگاسُس ہَرا نا رک او خیالداری ءِ یہودی ئس کرسہ مریک) ءِ 1969 ٹی نوشتہ کرے۔

1967 ئٹ شش دیہی جنگ نا نتیجہ ٹی کنافانی، پاپولر فرنٹ فار دی لبریشن آف فلسطین (PFLP) ٹی اوار مس ؤ اونا ترجمان جوڑ مس، تینا سیاسی ہٹکل آتے دوئی کریسہ بیداری تالان کرے ؤ فلسطینی جہد نا بندغ دوستی ئسکان ہیت ءِ سر کرے، نوشتہ کار تینا اِرا شناخت نا بابت ئٹ اسہ جار پارے:

"کنا سیاسی حیثیت کنا ناول نگار مننگ آن ودی مریک، ہراڑےئسکان کنا تعلق ءِ سیاست ؤ ناول اسہ ناقابل ءِ ونڈ ءُ معاملہ ئسے ؤ ای صفا پاننگ کننگ کیوہ کہ ای سیاسی حساب ئٹ  تفنگاٹ کہ ای اسے ناول نوشتہ کروک ئسے ئُٹ، داڑان جتا اف اٹ۔

30 مئی، 1972 نا دے، جاپانی خیسن آرمی PLFP تون اوار کاریم کرسہ لارڈ ائیرپورٹ آ مسافر تے آ سم شلار ہراڑے بیست ءُ شش بندغ مرگ ئنا گواچی مسر، کنافانی نا جند دا کاریم ٹی بشخ ہلتو ولے او اسرائیل نا برخلاف دا جلہو تا حمایتی ئس اسکہ ؤ سرعام اسرائیلی حکومت تون گپ ءُ تران کننگ نا خیال آن منہ کرے۔

 

ہراتم اسہ انٹرویو ئسے ٹی اودے اریفیر کہ فلسطینیک انتئے اسرائیلی تیتون گپ ءُ تران کپسہ؟ تو کنافانی ورندی تس کہ دیر تون ہیت کیر؟ او ہیت ءِ برجا تخسا پارے کہ دا ہیت و گپ ہندن مرو دنکہ 'زغم ءُ لِخ نا' تینتون گپ ءُ تران مرے۔ ننکن تینا ڈیہہ ئنا تینٹ خواجہی، ننا شان، ننا ننگ، ننا بندغ آتا بندغی حق آک ننکن ہندن المی ءُ دنکہ بندغ کن اونا  زند المی ءِ۔

8 جولائی، 1972 ٹی سی ءُ شش سال ئنا وحی تون کنافانی ؤ اَیدہ سال ئنا وحی تون اونا ایلم نا مسڑ لمیس ناجم، ہرانا پن آ او تینا اولی کتاب ءِ کریسس، اڑتوماک کار بمب ئسے نا سوب آن بئیروت ئٹی خلنگار، ہراڑے کہ کنافانی پوسکن تینا خاہوت تون جہی مسوسُس، ولدا موساد دا جلہو نا زمہ واری ءِ ارفے۔

کنافانی نا مرگ عرب جہان کن بھلو ویل ئس مس ولے او تینا رند ئٹ بیست گونڈ ئنگا قصہ غاتا والیم، ناول ؤ مضمون نوشتہ کریسس اِلّا، ہرا اوکان پد رکھنگار۔ دا نوشتانک اونا کہنگ نا پنجامیکو برسی نا یاتگیری ئٹ Middle East Eye ئٹ شینک مسنے، تفصیل:

 کنافانی فلسطین ؤ عرب جہان نا بھلا بھلا نوشہ کار  آتیتون تینا پن ءِ گنڈا اِنا، علاقہ ٹی کیہی اسکول ؤ ثقافتی گل آک اونا پن آ تخوک ءُ۔ 

اسرائیل ٹی اودے دہشتگرد ئسے نا پن ئٹ یات کیرہ، ولے فلسطینیک اودے اونا ادبی ہنر تا ؤ اوفتا جہد ءِ نرمی ئٹ درشان کروکا نا حیثیت ئٹ نازیفرہ، اونا قصہ غاک ایلو فلسطینی نوشتہ کار آتیکے کاریم تا کسر ءِ شابیت کریر ہرا اونا مزاحمتی لٹریچر نا سوچ ءِ مونی دننگ کن کمک مسر۔

اونا مرگ نا وخت، لبنان نا دی ڈیلی اسٹار اخبار کنافانی ءِ اسہ اندنو کمانڈو ئس پارے کہ ہرا ہچ وخت ئس ہم توفک نا جند ءِ کارمرز کتو، ہرا نا توفک قلم ئسکہ ؤ ہرا نا جنگجاہ اخبار نا پن آک ئسر۔

کنافانی نا پنی آ کاریم تے آن اسٹ ئس 1956 نا گونڈ ئنگا قصہ Letter from Ghaza (ہراتم نوشتہ کار بیست سال نا وحی ٹی ئس نوشتہ مس، اسے ورنا ءُ فلسطینی ئسے نا توار ئٹ نوشتہ مسنے ہرا غزہ ٹی تینا تباہ مروکا ہنکین آ ولدا بریک، تینا سنگت ئس ہرا اونا (سیکرامینٹو) آ سر مننگ کن باز بیمسرکی ئٹ چاری مریک اوڑکن خط ئسے ٹی اونا باز بےوڑ ٹپی مروکا ایلم نا مسڑ ءِ خننگ کن احوال ایتک ؤ تینا فیصلہ ءِ ہم درشان کیک کہ او تینا ظلم ؤ ڈکھ سہوکا لمئی جاگہ ٹی اڈ کروِ ءِ نا کہ  ہمو ڈغار تیکن درو ءِ ہراڑے خَرّسی، دیر ؤ گچین ءُ مُون مریر، اینو دادے خواننگ آن پد نن دا خنان کہ گدرینگوکا شش توہ سگنگ نا لائخ افس۔)